12 Nentor 2025

Përpjekjet për arritjen e një faze të re të armëpushimit në Gaza po përballen me një pengesë të re, pasi dhjetëra luftëtarë të Hamasit besohet se janë bllokuar në tunele nën qytetin Rafah.

I dërguari i posaçëm i SHBA-së, Jared Kushner, u kthye në Izrael të hënën për të vazhduar negociatat mbi marrëveshjen e brishtë të armëpushimit.

Ndër çështjet më të ndërlikuara mbeten çarmatosja e Hamasit, rindërtimi i Gazës dhe krijimi i një force ndërkombëtare sigurie. Pa një afat të qartë kohor, ekspertët dyshojnë se palët mund të arrijnë progres real. Sipas zyrtarëve amerikanë, rreth 200 luftëtarë të Hamasit janë të rrethuar nën zonën e quajtur “Vija e verdhë” në Rafah.

Uashingtoni ka propozuar një amnisti për ata që dorëzojnë armët, por Izraeli deri tani e ka refuzuar këtë ide. Hamasi ka paralajmëruar se luftëtarët nuk do të dorëzohen dhe ka kërkuar garanci për kalim të sigurt. Kushner dhe kryeministri izraelit Benjamin Netanyahu e diskutuan këtë çështje gjatë një takimi në Jerusalem, raporton BBC.

Zëdhënësja e qeverisë izraelite tha se qëllimi i fazës së parë është kthimi i pengjeve dhe dërgimi i ndihmave humanitare. Në fazën e dytë, Izraeli synon çarmatosjen e Hamasit dhe përjashtimin e tij nga çdo rol në qeverisjen e Gazës.

Që nga fillimi i luftës më 7 tetor 2023, janë vrarë mbi 69 mijë persona në Gaza, sipas Ministrisë së Shëndetësisë të drejtuar nga Hamasi. Faza e parë e armëpushimit solli lirimin e 20 pengjeve të gjallë dhe trupave të vdekur të 24 të tjerëve.

Izraeli në këmbim liroi 250 të burgosur palestinezë dhe mbi 1,700 të ndaluar nga Gaza. Të dyja palët akuzojnë njëra-tjetrën për shkelje të marrëveshjes. Izraeli pretendon se Hamasi po vonon kthimin e trupave të pengjeve, ndërsa Hamasi thotë se ushtria izraelite ka vrarë 240 civilë gjatë armëpushimit.

Aktualisht, Izraeli kontrollon rreth 53% të territorit të Gazës.
Vendet arabe shprehin shqetësim se ndarja aktuale mund të shndërrohet në ndarje të përhershme të enklavës.

Pa konsensus ndërkombëtar dhe pa besim mes palëve, e ardhmja e Gazës mbetet e paqartë. Ndërkohë, situata humanitare në territor vazhdon të përkeqësohet çdo ditë.